Кечээ тышкы иштер министри Жээнбек Кулубаев БУУнун Адам укуктары боюнча жогорку комиссары Фолькер Түрк менен анын Кыргызстанга болгон сапарынын алкагында жолугушту.
Ведомстводон маалымдашкандай, министр Кыргызстан БУУнун Адам укуктары боюнча Жогорку комиссарынын башкармалыгы (БУУ АУЖКБ) менен кызматташтыкты чыңдоого өзгөчө маани берерин белгилеп, аталган уюмдун өлкөдөгү демократиялык институттарды өнүктүрүүгө кошкон салымын жогору баалады.
Кулубаев Кыргызстан үчүнчү ирет БУУнун Адам укуктары боюнча кеңешинин (БУУ АУК) мүчөсү болуп шайланганын белгилеп, бул өлкөнүн адам укуктарын коргоо жаатындагы жетишкендиктерин эл аралык коомчулуктун тааныгандыгын айгинелей турганын баса белгиледи. Ошондой эле ал Кыргызстан БУУ АУК мүчөсү катары анын ишине активдүү катышып жатканын белгилеп, мисал катары Кыргызстандын демилгеси менен иштелип чыгып, 2024-жылдын жайында өткөн 56-сессияда кабыл алынган "Адам укуктары боюнча кеңешти укук боюнча кеңешчилер программасы жөнүндө маалымдоо" резолюциясын атады. Бул резолюция чакан мамлекеттерге адам укуктары жаатындагы мүмкүнчүлүктөрүн кеңейтүүгө өбөлгө түзөт.
Министр ошондой эле Кыргызстанда кылмыш-жаза мыйзамдарын гуманизациялоо, сот жана укук коргоо системаларын реформалоо боюнча активдүү иштер жүрүп жатканын, ошондой эле аялдар менен балдарды колдогон социалдык программалар натыйжалуу ишке ашырылып жатканын белгиледи.
Өз кезегинде Жогорку комиссар Кыргызстандын адам укуктарын коргоо жаатындагы лидерлигин жана өлкөдө демократиялык институттарды өнүктүрүү үчүн жарандык коомду чыңдоонун жана сөз эркиндигин мындан ары илгерилетүүнүн маанилүүлүгүн белгилеп, жогору баа бергендиги үчүн ыраазычылык билдирди.
Түрк БУУ АУЖКБ Кыргызстанга мыйзам үстөмдүгүн жана адам укуктарын коргоону камсыз кылуу боюнча бардык зарыл жардамдарды көрсөтүүнү уланта турганын белгиледи.
Жолугушуунун соңунда тараптар Кыргызстанда адам укуктарын коргоо жаатында мамлекеттик органдардын мүмкүнчүлүктөрүн бекемдөө боюнча кызматташтыкты улантуу жөнүндө макулдашышты.
Пикирлер (0)
Пикир жок. Сиз биринчилерден болушуңуз мүмкүн