Жээнбек Кулубаев Евробиримдиктин комиссары Йозеф Сикела менен жолукту

Бүгүн тышкы иштер министри Жээнбек Кулубаев Эл аралык өнөктөштүк боюнча Европа Биримдигинин комиссары Йозеф Сикела менен жолукту. Бул тууралуу ведомстводон маалымдашты.

Сүйлөшүүлөрдүн жүрүшүндө тараптар эки тараптуу маселелердин кеңири спектрин жана Кыргызстан менен Евробиримдиктин ортосундагы кызматташтыктын келечектүү долбоорлорун талкуулашты.

Министр Кулубаев Кыргызстан Европа Биримдиги менен өнөктөштүктү өнүктүрүүгө кызыкдар экенин баса белгилеп, кызматташтык экологиялык демилгелер, санариптик трансформация жана адамдык потенциалды өнүктүрүү сыяктуу маанилүү тармактарды камтышы керектигин билдирди.

“Европа Биримдиги Борбор Азияда, атап айтканда, Кыргызстанда ири инфраструктуралык долбоорлорго инвестиция салууга кызыкдар. Биз мындай мамилени кубаттайбыз жана толук көмөк көрсөтүүгө даярбыз”, – деп белгиледи Кулубаев.

Өз кезегинде Еврокомиссар Сикела жылуу кабыл алуу үчүн ыраазычылык билдирип, Кыргыз Республикасы менен Тажикстан Республикасынын ортосундагы чек ара маселелери боюнча сүйлөшүүлөрдүн ийгиликтүү аякташы менен кыргыз тарапты куттуктады.

Ошондой эле Еврокомиссар Европа Биримдиги Кыргызстан менен кызматташууну мындан ары өнүктүрүүгө жана тереңдетүүгө кызыкдар экенин белгилеп, экономикалык өз ара аракеттенүүнү бекемдөөгө жана аймакты туруктуу өнүктүрүүгө багытталган демилгелерди колдоого даяр экенин баса көрсөттү.

Жолугушуу өз ара түшүнүшүү жана ачык диалог маанайда өтүп, Кыргызстан менен Европа Биримдигинин ортосундагы мамилелердин жогорку деңгээлин дагы бир жолу тастыктады.