Кувейтке болгон расмий сапарынын алкагында Кыргызстандын тышкы иштер министри Жээнбек Кулубаев менен Кувейттин соода жана өнөр жай министри Халифа Абдулла аль-Ажилдин эки тараптуу жолугушуусу болуп өттү.
КР ТИМден билдииршкендей, сүйлөшүүлөрдүн жүрүшүндө Жээнбек Кулубаев Кыргызстанда жүргүзүлүп жаткан реформалар жана инвестициялык климатты жакшыртууга багытталган иш-чаралар тууралуу маалымат берди, ошондой эле эки өлкө ортосунда соода-экономикалык жана инвестициялык тармактарда ишке аша элек чоң потенциал бар экендигин белгиледи.
Бул багытта, Кыргызстандын тышкы иштер министри Кувейттин соода жана өнөр жай министрин 2025-жылдын июнь айынын аягында жана июль айынын башында Кыргызстанда өтө турган «Борбор Азия жана Булуңдагы араб өлкөлөрүнүн кызматташтык кеңеши» форматындагы инвестициялык форумдун алкагында Кыргызстанга келип кетүүгө чакырды.
Мындан тышкары, министр кыргыз-кувейт бизнес-форумун уюштуруу боюнча сунушун айтып, бул форум эки өлкөнүн ишкер чөйрөлөрүнүн ортосундагы бизнес байланыштарды орнотууга жана жаңы бизнес-демилгелерди талкуулоого арналган платформа болорун билдирди.
Өз кезегинде, Халифа Абдулла Аль-Ажил кыргыз тараптын чакыруусу үчүн ыраазычылык билдирип, кыргыз-кувейт бизнес-форумун өткөрүү боюнча демилгени колдоду. Ошондой эле Кувейт жана Кыргызстан ортосунда экономикалык кызматташтыктын бекемделиши жана кеңейиши маанилүү экенин белгиледи.
Жолугушуунун жыйынтыгында тараптар соода-экономикалык кызматташтыкты өнүктүрүү жана эки өлкөнүн ишкерлер чөйрөсү ортосунда өз ара аракеттенүүнү бекемдөө боюнча биргелешкен аракеттерди улантууну макулдашты.
Пикирлер (0)
Пикир жок. Сиз биринчилерден болушуңуз мүмкүн