Желим баштыктарды өндүрүүгө, сатууга тыюу салуу сунушталууда

Кыргызстанда желим баштыкчаларды алып келүүгө, өндүрүүгө жана  сатууга тыюу салуу сунушталууда. Бул тууралуу Жогорку Кеңештин басма сөз кызматы билдирди. 

Маалыматка караганда, 8-июнда Жогорку Кеңештин Агрардык саясат, суу ресурстары, экология жана регионалдык өнүктүрүү боюнча комитети «Кыргыз Республикасынын аймагында полимер пленкасынан пакеттерди жүгүртүүнү чектөө жөнүндө» мыйзам долбоорун жана «Кыргыз Республикасынын Бузуулар жөнүндө  кодексине өзгөртүүлөрдү киргизүү тууралуу» мыйзам долбоорун 1-окуудан карап, жактырды.

Мыйзам долбоорунун демилгечилери: Жогорку Кеңештин депутаттары М.Маматалиев, А.Жеенбеков, С.Келдибаев, З.Рысалиев, Т.Жоробеков, А.Дюшалиев, Н.Тотонов жана М.Жеенчороев.

Мыйзам долбоору  полимер материалдардын  адамдардын ден соолугуна жана айлана - чөйрөгө терс таасирин  азайтуу максатында иштелип чыккан. Бир жолу колдонулчу полимер  материалдардан жасалган  пакеттерди алып келүүгө, өндүрүүгө жана  сатууга  тыюу салуу сунушталууда.

Мыйзам долбоорунун демилгечилери  пластикалык таштандылардын  айлана - чөйрөгө кандай зыян алып келээрин эске алып, бир жолу колдонулчу  кооптуу желим  баштыктардын  көзөмөлсүз айлануусуна бөгөт коюу зарыл  экендигин белгилешти.

"Дүйнөлүк тажырыйба  тыюу салынган учурда  пластикалык таштандылардын  көлөмү кыйла азаярын, натыйжада анын адамдын ден соолугуна жана  айлана-чөйрөгө тийгизген  зыяндуу таасири да  төмөндөөрүн көрсөттү", - деп белгиледи бул маселе боюнча баяндама жасаган  депутат Марлен Маматалиев.