Жергиликтүү кеңештин депутаты инвестордон 1 млн талап кылган

Чолпон-Ата шаарына беш жылдыздуу мейманкана куруу пландалып, бирок жергиликтүү депутат инвестордон акча талап кылгандыктан иш создуктурулган. Бул тууралуу 30-майда президент Садыр Жапаров Чолпон-Ата шаарынын тургундары менен жолугушууда билдирди.

Кечээ шаарда парктын ачылышы болду. Президенттин айтымында, бир жыл мурун бул участок таштанды менен каралбай калгандыктан, ал жетекчиге курулушту тез арада бүтүрүүнү тапшырган. Парктын ачылышы жарым жылдан кийин болду.

Бирок, президент белгилегендей, инвестициянын эсебинен башка объектилердин курулушу жергиликтүү депутаттардын кысымынан жана опузалоосунан улам кечеңдеп жатат. Ошентип, депутат шаарга мейманкана курууга «макул» деп инвестордон бир миллион сом талап кылган.

«Былтыр сейил бакты куруунун алдында Чолпон-Ата шаарынын жетекчилигин, депутаттарды чогултуп, ушул жана башка объектилерди курууга көмөктөшүүнү, ички инвесторлорго жардам берүүнү өтүнгөм.

Колунда бар мекендештерибиздин бири бул жерге беш жылдыздуу мейманкана салмакчы болуп, ага ар кандай тоскоолдуктар жаралган.

"Курулушка тыюу салынат дешти, депутаттар акча талап кылышты. Анда мен депутаттардан мындай кылбагыла деп сурандым. Парктарды, мейманканаларды куруу үчүн инвесторлорду издеп жатабыз, бул жерде биздин жердешибиз, өзүнүн инвестору мейманкана курууну пландап жатат. Бирок, тилекке каршы, депутаттар укпай коюшту. Курулуш иштери жүрүп жатканы менен бир жыл өттү. Урмат деген бир депутат... аты жакшы, бирок өзүнүн урматы жок... инвесторго курулушка каршымын деп, башка депутаттарды да каршы чыгарды. Миллион сом алган. Дагы бирөөдөн 10 миң доллар алган. Инвестор мунун баарына көзүн жумуп, мейманкананын курулушун баштасак, керектүү акчаны берүүнү чечкенин айтат. Тилекке каршы, өзүбүздүн өнүгүүбүзгө өзүбүз тоскоол болуп жатабыз. Биз көрө албастык кылып, иштөөгө даяр болгондорго бут тособуз", - деди президент.