Бүгүн, 1-сентябрь күнү Ысык-Көл облусунун Жети-Өгүз районуна караштуу Ырдык айыл аймагындагы Жон-Булак айылында 100 орундуу "Бархат" аталышындагы кийим тигүү фабрикасы ачылды. Бул тууралуу президенттин Ысык-Көл облусунун ыйгарым укуктуу өкүлүнүн басма сөз кызматы маалымдады.
Ачылыш аземине Кыргыз Республикасынын Президентинин Ысык-Көл облусундагы ыйгарым укуктуу өкүлү Мирбек Кожоев, Ысык-Көл өнүктүрүү фондунун жетекчиси, Жети-Өгүз райондук мамлекеттик администрация башчысы-аким жана айыл тургундары катышышты. Тигүү цехине Жон-Булак айылындагы А. Курманбеков атындагы орто мектептин эски корпусу бөлүнүп берилген.
Облустагы тигүү фабрикаларын ачуу ишин Кыргыз Республикасынын Президентинин Ысык-Көл облусундагы ыйгарым укуктуу өкүлү Мирбек Кожоевдин демилгеси жана Ысык-Көл өнүктүрүү фондусунун каржылоосу ишке ашууда. Кийим тигүү фабрикаларынын ачылышынын бирден бир максаты элет элин иш менен камсыздоо жана жеңил өнөр-жайды өнүктүрүү болуп саналат. Тигилген кийимдер Кыргызстандын булуң-бурчуна жана чет өлкөлөргө экспорттоло тургандыгын тигүү фабрикасынын жетекчиси айтып өттү.
"Бархат" тигүү фабрикасына Ысык-Көл өнүктүрүү фонду тарабынан 8 миллион сом бөлүнгөн.
Пикирлер (0)
Пикир жок. Сиз биринчилерден болушуңуз мүмкүн