Жогорку Кеңештин 5-марттагы жалпы жыйынында Ак калпак майрамын бир жума бою белгилөө сунушталды. Мындай демилгени депутат Тазабек Икрамов көтөрүп чыкты.
"Бүгүн – Ак калпак күнү, баарыңыздарды майрамыңыздар менен куттуктайм. Биз ата-бабабыздан таберик калган улуттук баалуулугубуз ак калпакты майрам күнү эле эмес, такай кийип жүрүшүбүз керек. Ал үчүн Ак калпакты бир күн эле белгилебей, аны Ак калпак аптасы катары жарыяласак жакшы болмок. Ак калпак аптасын мыйзамдаштырып, күндү аптага которуп берсек, бара-бара жаштарды Ак калпакты такай кийип жүрүүгө көндүрүп алмакпыз. Мына ушул маселени чогуу ойлонуп көрүшүбүз керек", - деди депутат.
Мындан сырткары эл өкүлү өкмөт тарабынан кыргыздын улуттук кийимдеринин кадыр-баркын көтөрүү жана даңазалоо иштери жүрбөй жатканына нааразылыгын билдирип, атайын иш-чараларды, билим берүү мекемелеринде улуттук кийимдер тууралуу сабактар көбөйтүлүүсү керектигин айтты.
Пикирлер (1)