Жогорку Кеңештин төрагасы айымдарды майрамы менен куттуктады

Жогорку Кеңештин төрагасы Нурланбек Тургунбек уулу айымдарды 8-март – Аялдардын эл аралык күнү менен куттуктады.

Төраганын куттуктоосунда мындай деп айтылат:

"Урматтуу азылзаада айымдар!

Сиздерди Жогорку Кеңештин жана жеке өзүмдүн атымдан жаз менен кошо жарыша келген 8-март – Аялдардын эл аралык күнү менен чын дилимден куттуктайм! 

Чынында эле аялзаты дүйнөнүн көркү, үй-бүлөнүн куту жана жалпы эле коомубуздун таянычы. Түгөнгүс мээримдин, көөнөргүс аруулуктун ээси болгон айымдар бир үй-бүлөнүн гана түмөн түйшүгүн көтөрбөй, өлкөбүздөгү тынчтыкты жана туруктуулукту бекем кармап, доордун өзгөрүшүнө да өз салымын кошуп келет.

Ошондон улам кыргыздар эзелтен аялдарга аяр мамиле жасап, ар дайым сый-урмат көргөзүү менен коомчулуктагы ордун жогору баалап келишкен. Анткени, азыркы эгемен мамлекетибиздин пайдубалын эр-азаматтар менен эриш-аркак аялдарыбыз да түптөшкөнүн сыймыктануу менен айта алабыз. 

Алсак, тарыхыбызда өзүнүн акылы, тапкычтыгы, сабырдуулугу жана кайраттуулугу менен доорду өзгөртүп, элдин эсинде калган көптөгөн белгилүү айымдарыбыз бар. Журт башына оор күндөр түшкөндө Курманжан, Уркуя сындуу чыгаан энелерибиз эл башында турса, Зууракан Кайназарова, Керимбүбү Шопокова, Өлмөсхан Атабекова, Зууракан Иманкалыкова, Күлүйпа Кондучалова аттуу апаларыбыз азыркы кыргыз мамлекетин түптөөгө өзгөчө эмгек жумшашкан. Ал эми Сабира, Даркүл, Бакен, Таттыбүбү, Сайра, Айсулуу, Самара аттуу таланттарыбыз кыргыз маданиятын дүйнөгө таанытышкан. 

Дагы бир белгилей кетчү жагдай, эгемендүүлүк эми гана колубузга тийген учурда дээрлик бардык тармак кыйрап, жаңы системада эл эмне кылаарын билбей калганын жашыра албайбыз. Мына ошол кыйын учурда да коркпой, демилгени колго алып жапырт бизнеске кирген да аялдар болду. Айрым кыз-келиндерибиз чаар баштыгын көтөрүп алып бери жагы Орусия, Казакстанга, ары жагы Европа өлкөлөрүнө чейин соода кылганы кетсе, калганы өлкө ичиндеги Дордой сыяктуу ири базарлардын түптөлүп, күркүрөп иштеп кетишине эбегейсиз салымдарын кошушту. Андыктан биз эркектер өлкөбүздөгү ишкердиктин калыптанышынын башында тургандар дагы кыргыз айымдары экенин тана албайбыз. 

Ардактуу энелер, эже-карындаштар!

Ушу тапта да уучубуз куру эмес. Өзүн ар тармакта өнүктүрүп, ийгиликтерди багындырып келе жаткан кыз-келиндерибиздин катары калың. Саясат, экономика, бизнес, илим, билим берүү, саламаттык сактоо, маданият, спорт жана башка чөйрөдө, айтор, кайсы багытты албайлы аялзаты катышпаган, жүк көтөрбөгөн тармак жок. Мырзалар менен тең тайлаша улам жаңы бийиктиктерди багындырып келишет. Ошентсе да бийлик аялзатынын коомдогу жана саясаттагы ордун мындан ары да бекемдөө аракетин улантууда. Жогорку жана жергиликтүү кеңештерге аялдар үчүн 30%дык квота каралып, аны толук кепилдөө багытында шайлоо мыйзамдарына жаңы өзгөртүүлөр киргизилүүдө. Мындай кадам бийликтин эң жогорку бутагындагы гендердик теңчиликти камсыздоо менен бирге маанилүү чечимдерди кабыл алууда аялдардын катышуусуна өбөлгө түзөт. 

Кадырлуу айымдар!

Аял деген үч тамганын ичинде, бүт ааламды титиреткен күч жатат. Айрыкча улуттун эртеңи энелердин колунда! Анткени, сиздер келечек муунга татыктуу тарбия берип, кыргыз элинин руханий дөөлөттөрүн өнүктүрүп, аны жайылтууда ат көтөргүс оор жүктү аркалап, коомдун түйшүгүн бирге көтөрүп, доорубузду өзгөртүп келесиздер. Биз сиздердин үй-бүлөдө, жумушта, коомдо ар дайым сый-урматка жана камкордукка бөлөнүшүңүздөрдү каалайбыз. Асылзат айымдардын күчү, сабырдуулугу жана кайратуулугу мырзаларга дайыма дем берет. Мындан ары да араңыздардан тарых жаратып, доорду өзгөрткөн өрнөктүү айымдар чыга берерине терең ишенем. 

Сиздерге бекем ден соолук, бакыт-таалай жана албан-албан ийгиликтерди каалайм! Ар дайым асманыңыздар ачык, жүзүңүздөр жарык болсун!».