Жумгал районунда селдин кесепеттерин жоюу иштери жүрүүдө (фото)

Жумгал районунда 27-29-июль күндөрү жаап өткөн жамгырдын кесепетинен бир катар айылдарды сел каптап, учурда тазалоо иштери жүрүп жатат. Бул тууралуу ӨКМдин басма сөз кызматы билдирди.

Кызыл-Жылдыз айылында28-29-июль күндөрү жааган жамгырдын кесепетинен Чолок-Терек өрөөнүндө сел жүрүп, 7 га айдоо жерлерин суу каптаган. Жумгал райондук суу чарба башкармалыгынын балансындагы күнүмдүк суу сактагычты (БСР) жарып кетүү коркунучу жаралган. Ошондой эле Чолок-Терек дамбасынын 4 жеринен суу жеп, 1 чакырым аралыгын кум-шагылга толтурган. Суу чарба башкармалыгынан 1 жүктөгүч, айыл аймактан 1 экскаватор тартылган.

31-июль күнү 300 капка кум толтуруп, жээк бекемдөө иштерин жүргүзүлгөн. 1-август күнү тартылган техниканын жардамында дамбаны калыбына келтирүү жана бекемдөө иштери жүргүзүлгөн. ӨКМдин Нарын облусу боюнча башкармалыгынан 300 литр дизелдик күйүүчү май бөлүнүп берилген. 2-август күнү иш-чаралар улантылат.

Ошондой эле Куланак айыл аймагында 1-август күнү катуу жааган жаандын кесепетинен Нурбай-Булуң каналына суу батпай ашып, Таштанбек көчөсүндө жайгашкан 14 турак үйлөрдүн короолорун, Касымалы Ажы көчөсүндө жайгашкан 12 турак үйлөрдүн короолорун жана Шүкүрбек көчөсүндө жайгашкан 2 турак үйлөрдүн короолорун суу каптаган. Куткаруучулар жеринде тактоо иштерин жүргүзүшкөн. 2-август күнү тазалоо иштери жүргүзүлөт.