Өкмөт фармацевтикалык компанияларга дары жана медициналык жабдууларды арзандатууну сунуштады

Вице-премьер-министр Акрам Мадумаров фармацевтикалык компания өкүлдөрү менен жолугушту. Бул тууралуу өкмөттүн басма сөз кызматы билдирди.

Жолугушуунун жүрүшүндө вице-премьер-министр мамлекетке дары-дармектерди жана медициналык жабдууларды калк үчүн жеткиликтүү баада үзгүлтүксүз камсыздап берүү жаатында көмөк көрсөтүүнү сунуштады.

Өкмөт өз кезегинде дары-дармектерди жана жабдууларды сатып алуу процедурасын жөнөкөйлөштүрүүдө, ошондой эле тийиштүү дары-дармектерди сатып алууда компаниялар менен түз келишимдерди түзүү маселесинде көмөк көрсөтүү милдеттенмесин алды.

Фармацевтикалык компания өкүлдөрү дары-дармектерди сертификциялоо процедурасы, дары-дармек каражаттарын киргизүү эрежелери, фискалдык жана укук коргоо органдары тараптан текшерүүлөрдүн санын азайтуу сыяктуу бир катар сунуштарды билдиришти.

Вице-премьер-министр белгилегендей, бардык айтылган сунуштар Республикалык ыкчам штабдын мүчөлөрүнүн кароосуна киргизилет жана ал фармацевтикалык компания өкүлдөрүн өлкө үчүн татаал кырдаалда биргеликте иш алып барууга чакырды.