Өкмөт медициналык кызматкерлерге айлык маянасына үстөк кошумча компенсациялык төлөм үчүн 1,4 млрд сом бөлүп берди. Бул тууралуу премьер-министр Кубатбек Боронов 8-сентябрда билдирди.
Анын айтымында, өкмөт эпидемиялык очоктордо иштеген дарыгерлер үчүн айлык маянасына үстөк кошумча компенсациялык төлөмдөрдү үзгүлтүксүз берип келе жатат.
"Коронавирус менен күрөшүүдө адам ресурстарынын ичинен – дарыгерлерибиздин эмгеги баа жеткис», - деди өкмөт башчы.
Маалым болгондой, март айында 37,7 млн сом компенсация төлөнгөн, апрелде 111,1 млн сом, майда 110,7 млн сом, июнда 119,3 млн сом, июлда 41 649 медкызматкерге – 444,1 млн сом төлөнүп берилген.
«2020-жылдын 26-августуна карата компенсациялык төлөөлөрдүн жалпы суммасы 785,4 млн сомду түздү. 1-сентябрда өкмөттүн чечими менен 2020-жылдын аягына чейин кошумча 640 млн сом бөлүндү. Бөлүнгөн каражаттардын жалпы суммасы – 1 млрд 425 млн сом», - деди Боронов.
Пикирлер (0)
Пикир жок. Сиз биринчилерден болушуңуз мүмкүн