Өлкө аймагында "Коомдук транспорт" аталышындагы рейд жүрүүдө

Өлкө аймагында "Коомдук транспорт" аталышындагы рейд жүрүүдө. Бул тууралуу Жол кыймылынын коопсуздугун камсыздоо башкы башкармалыгынан билдиришти.

Маалыматка ылайык, рейддик иш-чара 26-февралдан 2-мартка чейин уланып, жүргүнчүлөрдү ташыган автобустардын жана жеке таксилердин ишмердүүлүгүн көзөмөлдөө күчөтүлөт.

Белгиленгендей, коомдук транспорттордун айдоочуларынын жүргүнчүлөрдү алууда же түшүрүүдө белгиленген жерлерде токтобой, аялдамаларга жетпей токтоп, жол кыймылынын башка катышуучуларына тоскоолдуктарды жаратып, жол тыгындарын пайда кылган учурлары көп кездешүүдө. Ошондой эле  айдоочулары унаа башкаруу учурунда тамеки тартып, же уюлдук телефонго алаксып, ичиндеги  жүргүнчүлөрдүн өмүрүнө тоскоолдук жараткан учурлары кездешүүдө.

"Рейддик иш-чара мына ушундай көрүнүштөрдүн алдын алуу максатында өткөрүлүүдө", - деп айтылат маалыматта.

Айрыкча коомдук транспорттордун техникалык абалына көңүл бурулуп, жүргүнчүлөрдү туура эмес жерлерден алган жана түшүргөн, ошондой эле аялдамаларда экинчи-үчүнчү катарга туура эмес токтотуп, башка айдоочуларга тоскоолдук жараткандарга 1000 сомдон 3000 сомго чейин айып салынат.