Өлкө аймагында туруксуз аба ырайына байланыштуу ӨКМ билдирүү таратты

31-октябрда эртең менен, күндүз жана 1-2-ноябрда Кыргызстандын аймагында аба ырайы кескин өзгөрүп, жамгыр жаап, кар түшүшү, дээрлик бардык дубандарда үшүк жүрүшү күтүлөт. Бул туурасында ӨКМдин маалымат кызматы билдирүү таратты.

"31-октябрда көпчүлүк аймактарда жамгыр төгүп, тоолуу райондордо кар, Чүй, Талас, Ош, Жалал-Абад, Ысык-Көл облустарынын айрым жерлеринде жаан-чачын катуу жаашы күтүлөт", — деп эскертишкен синоптиктер.

Шамалдын 15-20 метрге жетиши ыктымалдыгын айтышты.

31-октябрда күндүз жана 1-2-ноябрларда абанын температурасы төмөндөп, бир топ аймактарда үшүк жүрөрү кабарланды.

Чүй өрөөнүндө түнкүсүн 1…6, айрым жерлерде 0...-2 градус болуп, үшүк жүрөрү, күндүз 7…12 градус болорун билдиришти.

Таласта түнкүсүн 1…6, айрым жерлерде -1...-3 градус болуп, үшүк жүрөрү, күндүз 6…11ге төмөндөрүн эскертишти.

Ош, Жалал-Абад, Баткен облустарынын өрөөндөрүндө түнкүсүн 2…7 , күндүз 14…19 градус болот. Ош, Баткен дубандарынын тоо этектеринде түнкүсүн 1…6, айрым жерлерде -1...-3 градуска төмөндөп, үшүк жүрөт, ал эми күндүз 5…10го чамалайт.

Ысык-Көл ойдуңунда түнкүсүн 1…6, айрым жерлерде 0...-2 градус ылдыйлап, үшүк жүрөт, күндүз температура 6…11дин тегерегинде турат.

Нарын облусунун дыйканчылык аймактарында 0…-5, күндүз 6…11 градус жылуу болушу күтүлөт. Ал эми республиканын тоолуу райондорунда түнкүсүн -3…-8 градус суук, күндүз 1…6 градус жылуу болорун билдиришти. Кыргызстанда бул күндөрү суук бийик тоолуу райондордо байкалат, синоптиктер түнкүсүн -9…-14, күндүз 0…-5 градус болушу күтүлөрүн айтышты.