Өлкөнүн бир катар аймактарын суу каптады — ӨКМ

Күн мурун республиканын бир катар аймактарында күндүн жылышынан улам карлар эрип, суу каптады. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, Нарын облусунун Ат-Башы районунун Талды-Суу айылында 1 турак үйдүн короо жайын суу каптаган. Жерине ӨКМдин Нарын облусу боюнча башкармалыгынын башчысынын жетектөөсүндө жалпы 14 куткаруучу тартылган.

Куткаруучулар ыкчам түрдө турак үйдү каптап жаткан суунун нугун бурууга жетишип, учурда Талды-Суу айылынын түштүк тарабындагы коктудан топтолуп келүүчү суунун нугун буруу ишин жүргүзүүдө.

Мындан сырткары, Ат-Башы райондук №20 ЖТИ тарабынан Ат-Башы — Өзгөрүш унаа жолунун 31-чакырымынын суу жеп кетүү коркунучу бар айрым бөлүктөрүндө алдын алуу иштери жүргүзүлдү, унаа каттамы ачык, зыян келтирилген жок.

Ошондой эле Ысык-Көл облусунун Түп районунда абанын температурасынын жогорулашына байланыштуу карлар ээрип, К.Карасаев айыл аймагынын Токтоян айылында “Калмак арык” каналынан суулар ашып, турак үйлөрдүн короолорун каптап жаткандыгы тууралуу маалымат түшкөн.

Жерине Түп райондук өзгөчө кырдаалдар бөлүмүнөн 3 офицер тартылды.

Муну менен катар, Түп районундагы Казакстан менен Кыргызстандын чектешкен жеринде «Каркыра» көзөмөл пунктун суу каптап жаткандыгы тууралуу маалымат түшүп, жеринде Түп районунун администрациясы жана “Чайна-Роуд” жол тейлөө ишканасынын техникалары тиешелүү иш-чараны жүргүзүштү. Ал эми, ӨКМдин Ысык-Көл облустук башкармалыгынын башчысы жетектеген ыкчам топ жана айыл аймактан жүктөгүч тартылды.

Мындан сырткары, Чүй облусунун Жайыл районунда Суусамыр айыл аймагына караштуу Кайсар айылында кокту-колоттогу карлар ээрип, көпүрөгө батпай, жолду каптап жаткандыгы тууралуу маалымат түшкөн.

Жерине ӨКМдин Жайыл райондук №22 ӨКБдан 5 куткаруучу, 2 мотопомпа тартылып, кошумча кырдаалды жоюуга Суусамыр айыл аймагынан 1 трактор тартылган. Каражаттардын жардамында суунун нугу бурулуп, кырдаал жоюлду.

Ошондой эле, Чүй районундагы Ибраимов айыл аймагынын Арпа-Тектир айылында жолдорду жана турак үйлөрдүн короолорун каптап жаткандыгы тууралуу маалымат түшүп, жерине тактоо иштерин жүргүзүүгө ӨКМдин Чүй райондук өзгөчө кырдаалдар бөлүмүнөн ыкчам топ саат 21:20да жерине жетишти. Ибраимов айылынан 1 экскаватор жана 1 трактор, жергиликтүү тургундардан 10 адам тартылып, техниканын жардамында суу каптоо коркунучун жою жумуштары жүрүүдө.

Кошумча маалымат берилет.