Өмүрүндө мындай акча алган эмес. Жапаров мугалимдер эмгек өргүүсүнө 75-100 миң сом алып жатканын билдирди

Бүгүн, 1-июлда министрлер кабинетинин төрагасы Акылбек Жапаров салык кызматынын кызматкерлеринин кесиптик майрамына карата сөз сүйлөдү.

Өз сөзүндө министрлер кабинетинин башчысы салык кызматынын өлкөнүн бакубаттуулугун камсыздоого кошкон салымы тууралуу айтып, мугалимдердин айлыгы кыйла өскөнүн белгиледи.

"Ушул күндөрү мугалимдер эмгек өргүүсүн алып жатышат. Интернеттен алыскы Тогуз-Торо районунда 100 миң сомго жакын акча алганын окудум. Бишкектеги башталгыч класстын мугалими 75 миң сом алган. Эл кубанып, алар: карапайым эл өмүрүндө мындай акча алган эмес, деп жатышат", — деди ал.

Эске салсак, апрель айында мугалимдердин айлыгы эсептөө системасын өзгөртүү жолу менен көтөрүлгөн.