Кыргызстандык балбан Акжол Махмудов Казакстандагы күрөш боюнча Bolat Turlykhanov Cup эл аралык рейтингдик мелдештин финалында жеңишке жетишти.
Финалда Акжол Махмудов ирандык Пежман Солтанморад Поштамга эч кандай мүмкүнчүлүк бербей 9:0 эсебинде эки мүнөттө жеңип алды.
Мелдеш 2-5-июнь күндөрү Алматы шаарында өтүп, балбандар кыз-келиндер арасында, эркин жана грек-рим күрөшү боюнча күч сынашууда.
Акжол Махмудов грек-рим күрөшү боюнча 82 кг салмакта турнирдин чейрек финалынан баштап катышууда. Алгачкы атаандашы түркиялык Бурхан Акбудак болду. Күрөш башталганда Махмудов төрт упайга түркиялык балбанды көтөрүп чапты. Бирок Акбудак бир-экиден упай топтоп жатып Акжолго жетип алды. Жыйынтыгында эсеп 5:5 болгону менен, кыргыз балбанынын аракети үчүн жеңиш ага ооду.
Жарым финалда кыргыз балбаны грузиялык Торнике Дзамашвилини 4:1 эсебинде артта калтырып, финалга көтөрүлдү.
Пикирлер (0)
Пикир жок. Сиз биринчилерден болушуңуз мүмкүн