“Манас” аэропортун модернизациялоо жана өнүктүрүү” программасынын алкагында инвестор издөө боюнча сынак ушул жылдын төртүнчү кварталында башталат. Бул тууралуу Бишкектеги брифингде Мамлекеттик-жеке өнөктөштүк борборунун директору Санжар Болотов билдирди.
Анын айтымында, азыркы учурда Кыргызстандын өкмөтү менен IFC эл аралык компаниясы “Манас” аэропортун жеке жактарга берүү боюнча ири инфраструктуралык долбоорду ишке ашыруунун үстүндө иштеп жатат.
Болотов белгилегендей, азыркы учурда бир нече ири инвесторлор бар, алардын арасында Мюнхен, Малайзиянын аэропорттору, Түштүк Кореянын, Түркиянын эл аралык аэропортторунун өкүлдөрү жана башкалар бар.
“Бардык инвесторлор биздин өлкөнүн жайгашуусунун канчалык уникалдуу экенин түшүнүшөт. Башкача айтканда, инвесторлор өздөрүнүн, биз өзүбүздүн, башкача айтканда модернизацияланган аэпортко ээ болобуз”, - деди Болотов.
Ал сөз Бишкектеги “Манас” аэропорту жөнүндө болуп жатканын белгиледи. Башка шаарлардагы калган компаниялар тууралуу идея ойлонууну талап кылат.
“Келишим 28 жылга түзүлөт, анын аякташына 5 жыл калганда көз карандысыз эксперттик компания объектинин абалына техникалык текшерүү жүргүзө турганын кошумчалай кетейин. Башкача айтканда, инвестор жаңылоо, оңдоо, түзөөлөргө байланыштуу милдеттерди алат, ошентип, толук мөөнөт бүткөнгө чейин бизде жаңыланган аэропорт болот. Мындан тышкары, бизде менчик укугу калат”, - деди ал.
Долбоордун башкы максаты – Борбор Азияда ири аймактык хаб түзүү. Долбоорду ишке ашыруунун эсебинен ири инфраструктуралык инвестиция тартылып, “Манас” аэропортунан түшкөн киреше, жүргүнчү жана жүк ташуу көбөйөт, авиация тармагындагы бизнес процесстер жакшырат.
Пикирлер (0)
Пикир жок. Сиз биринчилерден болушуңуз мүмкүн