3-4-апрелде Самарканд шаарында "Борбор Азия – Европа Биримдиги" биринчи саммити өтөт, деп билдирди мамлекет башчынын басма сөз кызматы.
Өзбекстандын президенти Шавкат Мирзиёев төрагалык кыла турган саммитке Еврокеңештин президенти Антониу Кошта, Еврокомиссиянын президенти Урсула фон дер Ляйен, Казакстандын президенти Касым-Жомарт Токаев, Кыргызстандын президенти Садыр Жапаров, Тажикстандын президенти Эмомали Рахмон жана Түркмөнстандын президенти Сердар Бердымухамедов катышат.
"Келечекке инвестиция" урааны астында өтүп жаткан бул саммитке Европа реконструкция жана өнүктүрүү банкынын жана Европа инвестициялык банкынын жетекчилеринин да катышышы күтүлүүдө.
Мында Борбор Азия өлкөлөрү менен Европа Биримдигинин кызматташтыгын өнүктүрүү маселелери күн тартибинини чордонунда болмокчу. Анын ичинде инвестиция, соода, инновация, "жашыл" энергетика, тоо-кен өнөр жайы, айыл чарба, транспорт, логистика жана санариптештирүү тармактары камтылат.
Ошондой эле маданий, туристтик, илимий жана билим берүү багытындагы алмашууларга өзгөчө көңүл бурулат.
Мамлекет башчылары эл аралык жана аймактык актуалдуу маселелерди да талкуулашат. 4-апрелде алар Самарканддагы эл аралык климаттык форумдун пленардык жыйынына катышат.
Мындан тышкары, Өзбекстандын президентинин чет элдик делегациялар менен эки тараптуу жолугушууларды өткөрүшү айтылган.
Пикирлер (0)
Пикир жок. Сиз биринчилерден болушуңуз мүмкүн