Кыргызстан менен Өзбекстандын инвестиция тармагындагы эки тараптуу кызматташуусун өнүктүрүү жана кеңейтүүнүн алкагында Ысык-Көл облусундагы төрт объектини реконструкциялоо боюнча долбоорлорду ишке ашыруу боюнча макулдашууга жетишилди. Бул тууралуу Мамлекеттик мүлктү башкаруу боюнча мамлекеттик агенттиктен билдиришти.
Ведомстводон белгилегендей, учурда «Алтын кум», «Дилором», «Рохат», «Бустон» пансионаттары мамлекеттин балансында турат. Алар рентабелдүү эмес, анткени бөлмөлөрдүн санынын олуттуу бөлүгү начар же авариялык абалда болгондуктан пайдаланылбайт. Объекттердин моралдык жана физикалык жактан эскирген материалдык-техникалык базасы жана инфраструктурасы бүгүнкү күндө реконструкциялоо жана модернизациялоо үчүн ири инвестицияларды талап кылууда.
«Экономикалык кызматташууну тереңдетүү багытын, ошондой эле туризм тармагындагы эки тарапка тең пайдалуу долбоорлорду ишке ашырууга кызыкчылыкты эске алуу менен Өзбекстандын компаниялары менен сүйлөшүүлөр жүргүзүлүп, пансионаттарды инвестициялоо боюнча макулдашууга жетишилди. Буга чейин бул объектилерди Өзбекстан Республикасынын бизнеси башкарып келген, ал эми 2016-жылы Кыргызстан өз балансына каттаган. Жетишилген макулдашуулардын аркасында Өзбекстандан келген инвесторлорго объекттерди өнүктүрүү үчүн каражаттарды эркин инвестициялоо мүмкүнчүлүгүнө ээ болуу үчүн шарттар түзүлүүдө», — деп айтылат маалыматта.
Ошондой эле Казакстан менен «КазГУ» спорттук-ден соолукту чыңдоо лагери, «Олимп» спорттук-ден соолукту чыңдоо борбору, «Самал» эс алуу үйү жана «Казакстан» санаторийи боюнча өкмөттөр аралык келишимдер бар экендиги белгиледи.
Жакынкы арада казак тарап өзүнүн объектилерин өнүктүрүү үчүн инвестиция тартууну пландоодо.
Курулуп жаткан «Алтын кум», «Дилором», «Рохат» пансионаттары жана «Бустон» объектилери өзбек инвесторлоруна 49 жылдык мөөнөткө, ал эми жер тилкеси ижарага берилүүдө. Өз кезегинде өзбек компаниялары объектилерди реконструкциялоодо.
«Алтын кум» пансионаты «Ташкент механикалык заводу» акционердик коомуна, «Дилором» — «Асакабанк» акционердик коомуна, «Рохат» — Өзбекстан Республикасынын Тышкы экономикалык иштер улуттук банкына, «Бустон» - «Узпромстройбанк» акционердик коомуна өткөрүлүп берилди.
Объекттер эл аралык талаптарга ылайык, үч-төрт жылдыз деңгээлинде өнүктүрүү жана модернизациялоо шарттары менен өзбекстандык компанияларга өткөрүлүп берилген. Ошол эле учурда кызматкерлердин 80 пайыздан кем эмеси Кыргызстандын жарандары болушу керек. Инвестицияларды өз ара илгерилетүү жана коргоо боюнча Өзбекстан менен өкмөттөр аралык макулдашууга ылайык, тараптар экинчи тараптын инвесторлорунун өз аймагындагы инвестицияларына уруксат беришет жана кубаттайт, ошондой эле бул инвестицияларды толук жана шартсыз укуктук коргоого кепилдик беришет.
Алдын ала болжолдуу инвестициянын көлөмү ар бир объект үчүн 15-20 миллион долларды түзөт.
"Пансионаттарды реконструкциялоо долбоорлору алардын эл аралык стандарттарга ылайык толук жана натыйжалуу иштешин, тазалоочу жайларды оңдоону, ошондой эле республикалык жана жергиликтүү бюджеттерге салыктык түшүүлөрдү көбөйтүүнү, жаңы жумуш орундарын түзүүнү, туристтик агымды жана андан түшкөн кирешени олуттуу көбөйтүүнү камсыз кылат", - деп кошумчалады Мамлекеттик мүлктү башкаруу боюнча мамлекеттик агенттиктен.
Анын айтымында, салыктык түшүүлөрдөн эле жергиликтүү бюджетке жылына 130 миллион сомдон ашык киреше түшөт. Ар бир объектте 200 жумушчу орун түзүлөт. Жергиликтүү калк үчүн пансионаттардын аймагында бизнес ачууга (кафелер, ресторандар, кинотеатрлар жана башка тиешелүү кызматтар) мүмкүнчүлүктөр түзүлөт.
Пикирлер (0)
Пикир жок. Сиз биринчилерден болушуңуз мүмкүн