Нарын облусунун Ак-Талаа районунда коронавирус аныкталган айылдар курчоого алынды. Бул тууралуу Өкмөттүн облустагы ыйгарым укуктуу өкүлүнүн басма сөз кызматынан билдиришти.
Маалыматка ылайык, райондогу Ак-Кыя, Көк-Жар, Баетов жана Үгүт айылдары курчалып, посттор коюлган. Мобилдик топтор ооругандар менен контакт болгондорду аныктап, анализдер алынып абал туруктуу.
Ал эми Ак-Талаа районунда инфекцияны 18 адам жуктуруп алган. Алар Ак-Кыя айылынан 14, Баетов айылынан 2, Үгүт айылынан 2 адамдан аныкталган. Райондогу оорунун очогу Нарын облустук төрөт бөлүмүндө илдетти жуктуруп алган 2 аял менен байланышта болгон адамдардан чыкканы айтылды.
Учурда вирус табылган адамдардын бардыгы райондук ооруканада изоляцияга алынган. Алар менен контакт болгондор обсервацияга жаткырылган.
22-майда Ак-Кыя айылындагы вирус жаңы табылган 8 адам ооруканага жатып дарыланууга каршылыгын билдиришкен. Жергиликтүү бийлик тарабынан түшүндүрүү иштери жүргүзүлүп, бардыгы ооруканага алынган.
Пикирлер (0)
Пикир жок. Сиз биринчилерден болушуңуз мүмкүн