Азизбек Турсунбаев кыргызстандыктарды Нооруз майрамы менен куттуктады

Жогорку Кеңештин депутаты Азизбек Турсунбаев жалпы кыргызстандыктарды бүгүнкү Нооруз майрамы менен куттуктады.

Төмөндө эл өкүлүнүн куттуктоо тексти:

“Урматтуу мекендештер!

Күн менен түн теңелип, жаңы күн, жаңы жылдын башталышы катары ата-бабаларыбыз майрамдап келген Нооруз майрамы менен жалпыңыздарды куттуктайм.

Нооруз майрамы менен бирге күн жылымдап жаз келип, кычыраган сууктун мизи кайтат. Кышы бою уйкуда жаткан табият ойгонуп, сулуулугу артып, көркүнө чыгат. Ушул күндөн тарта жакшы тилек, жакшы ниет менен айдоо талааларында дыйканчылык иштери башталып, эмгектин шаңы байкалат.

Нооруз майрамы – ата-бабаларыбыздан калган байыркы мурастарды сактоо жана аларды кийинки муундарга жоготпой өткөрүп берүүнүн да майрамы болуп калды. Себеби, бул күнү республикабыздын жер-жерлеринде эзелтеден келе жаткан улуттук оюндарыбыз ойнолуп, каада-салттарыбыз кайрадан эске салынат. Ар бир үйдө ак дасторкон толо дүйүм тамак-аш жайнап, чоң ата-чоң энелерибиз ак баталарын беришет.

Кадырлуу замандаштар!

Нооруз майрамында жергебизге тынчтык, токчулук жана өнүгүп-өсүүлөрдү каалайм. Ар бириңиздердин үйүңүздөрдө бекем ынтымак, бакыт-таалай орносун. Ырыскыңыздар мол болсун. Жалпыңыздарга бекем ден соолук жана узак өмүр каалайм!

Нооруз майрамыңыздар кут болсун!”.