Өкмөт мүчөлөрү жана аппараттын айрым кызматкерлери Кубатбек Бороновго премьер-министр кызматынын ыйгарым укуктарын өткөрүп берүү иш-чарасы учурунда санитардык нормалардын сакталбаганы үчүн салынган айып пулду төлөштү. Бул тууралуу бүгүн, 23-июнда Бишкек шаардык Санэпидкөзөмөл борборунан билдиришти.
Маалыматка караганда, аралыкты сактабай жана беткапсыз сүрөткө түшкөн өкмөт мүчөлөрү жалпы 140 миң сом төлөштү. Бардыгы болуп 28 адамга айып салынды.
Алардын арасында премьер-министр Кубатбек Боронов, экс-премьер-министр Мухаммедкалый Абылгазиев, вице-премьер-министр Аида Исмаилова, вице-премьер-министр Акрам Мадумаров, вице-премьер-министр Эркин Асрандиев, бөлүм башчылар жана башкалар бар. Алардын ар бири 5 миң сомдон айып төлөштү.
Буга чейин президент Сооронбай Жээнбеков: "Өкмөт мүчөлөрү топтошуп, социалдык дистанцияны сактабай, бет капсыз сүрөткө түшүштү. Бул сүрөт бүт өлкөгө тарады. Мындай нерселер аракеттерибиздин баарын жокко чыгарат", - деп аларга айып пул салуу керектигин айткан.
Пикирлер (0)
Пикир жок. Сиз биринчилерден болушуңуз мүмкүн