Бишкекте адам уурдоого шектелип издөөдө жүргөн жаран кармалды

Бишкекте адам уурдоого шектүү 27 жаштагы Ж.А. кармалды. Бул тууралуу Октябрь райондук ички иштер башкармалыгынын басма сөз кызматы билдирди.

Анын айтымында, ал бир жылдан бери издөөдө жүргөн.

«2023-жылдын 1-июлунда милицияга жаран арыз менен кайрылып, И аттуу адамга карата чара көрүү өтүнүчү менен кайрылган. Арыз ээсинин айтымында, ошол эле жылдын 28-февралында Совмин кичи районунда аны уурдап, шаардын сыртына алып чыгып, сабап жана 370 миң сомун тоноп кетишкен», - деп айтылат маалыматта.

Аталган факты КРнын Кылмыш-жаза кодексинин “Адам уурдоо” беренеси боюнча катталган. Шектүү издөөдө жүргөндөрдүн тизмесине киргизилген.

Бир жылдан кийин ал адам кармалып, борбор калаанын ички иштер башкармалыгынын убактылуу кармоочу жайына киргизилген. Учурда тергөө иштери уланууда.