Бишкекте бүгүндөн тарта жылуулук бериле баштайт

Бишкек шаарында бүгүн, 3-ноябрдан тарта жылытуу мезгили башталат.

Муниципалитеттен билдиришкендей, бүгүн кечинде Бишкек жылуулук электр борборунун кызматкерлери жылуулук өндүрүү жана аны андан ары "Бишкек жылуулук тармагы"  муниципалдык ишканасына берүү процессин баштайт.

Бардык колдонулуп жаткан жабдуулар күчөтүлгөн режимде иштөөдө, техникалык кызматкерлер коюлган параметрлерди камсыздоого толук даяр.

"Бишкекжылуулуктармагы" жана "Бишкекжылуулукэнерго" муниципалдык ишканалары бардык даярдык иштерин аяктап, шаардын объектилерине жылуулукту өз убагында жана ишенимдүү туташтырууну камсыз кылууга толук даяр.

Ишканалардын техникалык кызматкерлери мүмкүн болуучу кайрылууларга жана өзгөчө кырдаалдарга ыкчам жооп кайтаруу максатында күчөтүлгөн иш режимине өтүштү.

Объектилерди жылытуу системасына кошуу бир нече этап менен жүргүзүлөт:

Биринчи кезекте — социалдык объектилер: мектептер, бала бакчалар, медициналык мекемелер, төрөт үйлөрү жана социалдык коргоо уюмдары;

Экинчи кезекте — көп кабаттуу турак үйлөр жана жеке сектор.