Быйыл ажылык сапарга Кыргызстан үчүн 6060 орун бөлүндү

Кыргызстанга 2025-жылдагы ажылык сапар үчүн 6060 орун бөлүндү. Бул тууралуу Дин иштери боюнча мамлекеттик комиссиясынан билдиришти.

Маалыматта белгиленгендей, Дин иштери боюнча мамлекеттик комиссиясынын директору Азамат Юсупов жана Кыргызстан мусулмандарынын дин башкармалыгынын башчысы Абдулазиз Закиров Сауд Аравиянын Жидда шаарында 2025-жылга каралган ажылык иштерин уюштуруу боюнча эки тараптуу келишимди ишке ашыруу максатында иш сапарында жүрүшөт.

Анда Азамат Юсупов менен Абдулазиз Закиров Сауд Аравиянын ажылык министринин орун басары Абдель Фаттах бин Сулейман менен жолугушуп, ажылык сапарын уюштуруу маселелери талкууланды.

Эки тараптуу жолугушуунун жыйынтыгында 2025-жылдагы ажылык иштерин уюштуруу боюнча келишимдерге кол коюлуп, Кыргызстанга 6060 квота бөлүндү.