Бизди чакыра бербеңиздер. Айбек Жунушалиев шаардык кеңештин жыйынынан чыгып кетти

Бүгүн, 30-январда Бишкек шаардык кеңешинин бир нече фракциялары жыйын өткөрүп, ага борбор калаанын мэри Айбек Жунушалиев чакырылды.

Жыйындын жүрүшүндө муниципалитеттин башчысы депутаттардан мэриянын ишине тоскоолдук жаратпоону жана жетекчилерди дайыма жыйындарга чакырбоону өтүндү.

«Демек, сиз БШКнын сессиясын 14-февралга койдуңуз, биз ал жерде өз ишибиз боюнча отчет беребиз. Ага чейин сиздин уруксатыңыз менен биз ишибизге чыксак», - деди борбор калаанын мэри.

Депутат Куванычбек Конгантиев мэрдин мындай чечимине макул болгон жок, бирок Айбек Жунушалиев жыйындан чыгып кетти. Кийинчерээк Куванычбек Конгантиев фракция жыйындарына борбор калаанын мэрин гана чакырууну сунуштаган.