Депутат Жалал-Абадга технопарк зонасын түзүүнү сунуштады

Жогорку Кеңештин депутаты Мейкинбек Абдалиев Жалал-Абад облусуна "Ноокен Технопаркы" эркин экономикалык зонасын түзүүнү демилгеледи. Мыйзам долбоору Жогорку Кеңештин сайтында коомдук талкууга коюлду.

Максаты — Ноокен районун тездик менен өнүктүрүү, регионго жогорку технологиялык өндүрүштөрдү жана инновациялык бизнести тартуу.

Аталган зона үчүн райондун аймагынан 180 гектар жер керектелет.

Технопарк төмөнкү тармактарга багытталат:

- маалыматтык технологиялар, анын ичинде программалык камсыздоону иштеп чыгуу жана маалыматтарды талдоо;

- саламаттык сактоо жаатындагы инновациялык чечимдерди иштеп чыгууга багытталган биотехнологиялар жана медициналык жабдуулар;

- энергетикалык жана экологиялык таза технологиялар, анын ичинде энергиянын кайра жаралуу булактары жана туруктуу өндүрүш процесстери;

- өндүрүштүк автоматташтыруу жана робототехника.

Технопарктын долбоору дүйнөнүн ар кайсы өлкөлөрүнүн технологиялык компанияларын тартууга багытталган.