Түндүк-Түштүк унаа жолу боюнча түзүлгөн депутаттык комиссия аталган жолдун курулушу менен таанышып чыкты. Бул тууралуу Жогорку Кеңештин басма сөз кызматынан билдиришти.
Депутаттык комиссиянын мүчөлөрү Жалал-Абаддан Көк-Арт ашуусуна чейинки жолдун курулушун көрүп, туннелдин курулуш иштери менен таанышышты. Жалал-Абад шаарынан Көк-Арт ашуусуна чейинки жол дээрлик курулуп бүтүп калган. Асфальт төшөлүп, тиешелүү жерлерине көпүрөлөр курулуп, жол белгилери коюлган. Транспорт жана коммуникациялар министринин орун басары Нурлан Кайынбаевдин айтканына караганда, туннелдин эки тарабына долбоордон тышкары 3 асма көпүрө, 2 галерея куруу зарылдыгы келип чыккан. Алдын ала эсептөөлөргө караганда, болжол менен долбоордун наркы 21 миллион доллар турат. Бул курулуштун жүрүшүнөн улам ачык болгон зарылчылык десе болот.
Көк-Арттагы туннелдин курулушу болсо 2018-жылы эле аяктамак экен. Кечиккенинин бир себеби пандемия, экинчи себеби туннелге чейин мурда жолдун болбогондугу, үчүнчүсү туннел казылып жаткан тоо тектеринин борпоңдугу болууда деп түшүндүрүштү. Депутаттык комиссиянын мүчөлөрү туннелдеги курулуштун жүрүшү, авариялык штольнядагы абал менен дыкат таанышып, адистер менен баарлашып кеңири маалымат алышты. Иштин сапатын көзөмөлдөөнүн үзгүлтүксүз болушуна басым жасашты. Жумушчулардын айлык акыларына кызыгышты.
Пикирлер (0)
Пикир жок. Сиз биринчилерден болушуңуз мүмкүн