Дүйнөлүк банктын өкүлдөрү КР саламаттык сактоо тармагын санариптештирүү иштери менен таанышты

Саламаттык сактоо министри Алымкадыр Бейшеналиев башкаруучу директору жана башкы административдик директору Вэньцай Чжан жетектеген Дүйнөлүк банктын делегациясы менен Бишкектеги №6 Үй-бүлөлүк медицина борборуна барды.

Ведомстводон маалымдашкандай, делегациянын курамында Дүйнөлүк банктын Борбор Азия боюнча аймактык директору Татьяна Проскурякова жана Кыргызстандагы өкүлчүлүгүнүн менеджери Хью Ридделл бар.

Иш сапардын алкагында Дүйнөлүк банктын өкүлдөрү санариптик саламаттык сактоо тармагындагы жетишкендиктер менен таанышты.

Sanarip Clinic маалымат тутумуна өзгөчө көңүл бурулду, ал бейтаптардын санариптик медициналык документтерин жүргүзүү үчүн бир нече негизги модулдарды камтыйт:

• дарыгердин кабыл алуусуна онлайн жазылуу — бейтаптар кабыл алууга аралыктан жазыла алышат, бул медициналык жардамдын жеткиликтүүлүгүн жеңилдетет:
• каттоо жайы – ыкчам кезекке турууну жана электрондук талонду түзүүнү камсыз кылат;
• бейтаптын амбулатордук картасы – бул бардык медициналык маалыматтарды бириктирүү менен бейтаптын ден соолугунун абалы жөнүндө толук маалыматты камтыган санариптик документ;
• каттоодогу калк - медициналык мекемелерге катталган бейтаптардын бирдиктүү маалымат базасы;
• эмгекке жарамсыздык баракчасы – бул менчигинин түрүнө карабастан бардык уюмдар тарабынан расмий түрдө таанылган эмгекке жарамсыздык баракчасы.

Ошондой эле аларга лабораториялык изилдөөлөрдү каттоо жана кайра иштетүү процессин автоматташтырган iLAB лабораториялык маалымат системасы көрсөтүлдү. Бул система Sanarip Clinic менен интеграцияланган, бул бейтаптын амбулатордук каттоосунан түздөн-түз анализдерди жөнөтүүгө жана натыйжаларды автоматтык түрдө жаңыртууга мүмкүндүк берет.

BI платформасы дагы бир маанилүү инструмент болуп саналат, ал баштапкы медициналык-санитардык жардам кызматынын деңгээлинде медициналык кызматтын сапатынын көрсөткүчтөрүн визуализациялап, оперативдүү башкарууну жана көрсөтүлгөн жардамдын натыйжалуулугун жогорулатууну камсыз кылат.

Саламаттык сактоо министри Алымкадыр Бейшеналиев Дүйнөлүк банк менен биргелешип иш алып барууну жогору баалап, кызмат көрсөтүүнүн сапатын жогорулатуунун инструменттеринин бири катары саламаттыкты сактоо тармагында санариптик өнүгүүнүн маанилүүлүгүн белгиледи.

"Саламаттык сактоо тармагына санариптик чечимдерди киргизүү – бул келечекке жасалган стратегиялык кадам. Биз заманбап технологиялар калктын медициналык жардамга жеткиликтүүлүгүн жакшыртууга жана дарыгерлерибиздин ишинин натыйжалуулугун жогорулатууга кандайча жардам берип жатканын көрүп жатабыз. Дүйнөлүк банк менен кызматташуунун аркасында биз жарандарыбыз үчүн ыңгайлуу жана сапаттуу саламаттык сактоо системасын түзүп жатабыз", - деди министр.

Дүйнөлүк банктын өкүлдөрү саламаттык сактоо тармагындагы санариптик өнүгүүнүн жыйынтыктарына өзгөчө кызыгуу көрсөтүштү.