«ЭСКИ» жана «ЖАҢЫ»

Мезгил барат «жаңы» - «эски» деп бөлүнүп,

Ачык эле айтылып  да, көрүнүп,

Жаңылыкты колдоор элем кош колдоп,

«Эскилерге»  турбаса «жаңы» сөгүнүп.

Мейли мезгил «жаңы» - «эски» деп чектесин,

Улуулардын  «эскилерин» эстесин.

Биз ортодо байкоо салып туралы,

«Жаңы» барып «жардан алыс кетпесин»!

Сырттан эмне келсе болду – «жаңы» деп,

Мезгил, кокус, жаңылбасын, тактасын.

Чет жердеги  жерип бүткөн «эскилер»,

Балким, бизге, «жаңы» болуп жатпасын!

Ырас, эртең, ал «жаңы» да эскирер,

«Эскилерин» пайдубалым-деп билер.

Унутулбай калкып чыгаар ошондо,

Мезгил  бүгүн жерип жаткан «эскилер».

Сулайман Рысбаев, балдар жазуучусу