Ысык-Көлдө жол кырсыгы катталып, дагы бир кыз каза болду

Балыкчы-Ананьево-Каракол унаа жолунда жол кырсыгынан бир кыз каза болду. Бул тууралуу ӨКМнын маалымат кызматы кабарлады.

Маалыматка караганда, Ысык-Көл району, Балыкчы-Ананьево-Каракол унаа жолунун 32-чакырымында (Чырпыкты айылы) "Тойота-Раф4" жана "Тойота-Ярис" үлгүсүндөгү унаалар кагышкан.

Жол кырсыктын кесепетинен 1 кыз каза болуп, 3 адам жабыркаган (аты-жөндөрү такталууда).

Жерине Ысык-Көл райондук №31 ӨКБдан 3 куткаруучу тартылып, жабыркаган жарандарды тез жардам кызматынын унаасына салып беришкен, ал эми каза болгон кыздын жансыз денеси ИИМ кызматкерлерине өткөрүлүп берилген.