Казакстандын батышында автоунаа газынын тартыштыгы күч алды

Казакстандын батышында автоунаа газынын тартыштыгы күч алды. Бул тууралуу “КазТАГ” маалымат агенттиги жазды.

Маалыматка ылайык, Казакстандын батышында автоунаа газынын жетишсиздиги байкалганын Казакстан Республикасынын Энергетика министрлиги тастыктаган.

“Октябрга карата Батыш Казакстан облусуна “Жайыкмунай” ЖЧКсынын ресурстарынан 3510 тонна суюлтулган мунай газы бөлүнгөн. Ишкананын маалыматы боюнча, буга чейин 2689 тонна жөнөтүлгөн, бул жалпы көлөмдүн 77%ын түзүп, суткасына 110 тоннага жакын жүк ташылды.

Айта кетчү нерсе, октябрь айында Атырау нефтини кайра иштетүүчү заводунда пландуу оңдоо иштерине байланыштуу “Жайыкмунай” ишканасы суюлтулган газды Батыш Казакстанга гана эмес, Атырау облусуна да жеткирип, алардын муктаждыктарына 2490 тонна бөлүп берген. Министрлик ай сайын заводдордогу өндүрүштүн көлөмүнө жараша 130-140 миң тонна суюлтулган газды рынокко бөлүп турат, ал эми иш жүзүндөгү керектөө 164 миң тоннаны түзүп, 20-25%га жакын жетишсиздикти жаратууда”, - деп айтылат министрликтин билдирүүсүндө.

Министрлик газдын тартыштыгынын негизги себеби катары керектөөнүн көбөйүшүн билдирген.

2023-жылы Казакстанда суюлтулган газды керектөө 14%га өсүп, 2,2 млн тоннаны түздү. Өсүү газ менен жүрүүчү унаалардын санынын өсүшү менен байланыштуу, 2022-жылы 491 миң болгон болсо, 2023-жылдын аягына карата алардын саны 582 миңди түзгөн.

Министрлик кошумчалагандай, учурда ички рынокту камсыз кылуу максатында суюлтулган газды Казакстандын аймагынан сыртка автомобиль жана темир жол транспорту менен алып чыгууга тыюу салынган ал 14-ноябрга чейин созулат.