Кыргызстанда уран кендерин иштетүүгө тыюу салуу алынып салынышы мүмкүн

Кыргызстан уран жана торий кендерин иштетүүгө тыюу салууну алып салуу ниетинде. Министрлер кабинети тарабынан демилгеленген мыйзам долбоору коомдук талкууга коюлду.

Жаратылыш ресурстары, экология жана техникалык көзөмөл министрлиги колдонуудагы мыйзам калктын саламаттыгын, жерлерди, суу объекттерин, өсүмдүктөр жана жаныбарлар дүйнөсүн коргоого, ошондой эле республикада радиациялык жана экологиялык коопсуздукту орнотууга багытталганын белгилейт. Бирок аны колдонуу "эл аралык жана улуттук кризистик көрүнүштөрдүн бүтүндөй өлкөнүн экономикасы жана өнүгүшү үчүн терс кесепеттерин" күчөттү.

Бул көрүнүштөрдү жана алардын кесепеттерин, чиновниктердин айтымында, мыйзам иштелип чыгып, кабыл алынып жатканда алдын ала айтуу мүмкүн эмес.

«Атап айтканда, мыйзам чыгаруучу COVID-19 пандемиясынын терс экономикалык кесепеттеринин башталышын, ошондой эле республиканын эң ири соода өнөктөштөрүнүн бири болгон Россия Федерациясына каршы масштабдуу финансылык санкциялардын киргизилишин алдын ала көрө алган эмес», - деп айтылат негиздемеде.

Кыргызстандын экономикасы тез арада башка киреше булактарына муктаж экени белгиленген. Уран жана торийди казып алуу жана экспорттоо Кыргызстандын экономикасынын маанилүү компоненттери болуу мүмкүнчүлүгүнө ээ, деп билдирди министрлер кабинети.

Бийлик өкүлдөрү уран жана торий казып алуунун айлана-чөйрөгө жана калктын ден соолугуна тийгизген зыянын азайтуу боюнча мамлекеттик органдар чараларды көрөрүн убада кылууда. Тактап айтканда, алар жер казынасын пайдалануучулар үчүн катуу экологиялык нормаларды жана стандарттарды киргизишет, уран жана торий казып алуу иштеринин айлана-чөйрөгө жана калктын ден соолугуна тийгизген таасирин такай көзөмөлдөп турушат, ошондой эле өнөр жай кызматкерлерин атайын окуудан өткөрөт.

Белгилей кетсек, буга чейин Кыргыз Республикасынын Президенти Садыр Жапаров Кызыл-Омпол уран кенин иштетүү долбоору боюнча пикирин билдирген. Ал уранга келгенде коркпоого чакырып, урандын түрлөрүн билип, анын кандай деңгээлде коркунуч туудурарын түшүнүү керектигин айткан.