Казакстандын беш облусунда куш тумоосу катталды. Бул тууралуу айыл чарба министринин орун басары Гүлмира Исаева билдиргенин Tengrinews.kz басылмасы жазды.
Гүлмира Исаеванын айтымында, Казакстандын түндүк облустарында тактап айтканда Акмоло, Костанай, Павлодар жана Карагандыда масалык түрдө үй канаттуулары кырылууда.
«Ушул тапта беш облуска караштуу 26 райондо жана 47 айылда канаттуулардын кырылып жатканы аныкталды. Жеке үй-жайларда 12 926 канаттуу өлгөн. Түндүк Казакстан облусунда 41 миңден ашык куш кырылган», - деди Гүлмира Исаева.
Маалым болгондой, 26-августта Казакстан Орусиянын Омск облусунда куш тумоосу катталгандыктан, ал жактан канаттуулардын этин алып келүүгө тыюу салган. Казак бийлиги үй канаттуулары кырылган фермерлерге компенсация төлөнөрүн билдирген.
Пикирлер (0)
Пикир жок. Сиз биринчилерден болушуңуз мүмкүн