Баткен облусунун Лейлек аймактык ооруканасынын кызматкерлери оорукана жетекчиси Асан Кожомовдун кызматтан кетишине нараазы болуп, президент Сооронбай Жээнбековго кайрылуу жолдошту. Бул тууралуу анын жактоочулары жазган арызында кабарланды.
Кызматкерлер жолдогон кайрылууда жазылгандай, А.Кожомов 2010-жылдан бери аталган оорукананын директору болуп иштеп келет. “Ошол убакыттан тарта жасаган иштерин Лейлек районунун эли жана ушул бейтапканада эмгектенгендер баалашат”, - деп жазылат арызда.
Ошондой эле алар ооруканада бир топ ыңгайлуу шарттар түзүлүп, инфраструктурасы жаңыланганын белгилешкен. “Кожомовдун 40 жылдык эмгеги эске алынбай жумуштан бошотулганы биздин кызматкерлерди нааразы кылды”, - деп билдиришти алар.
Арызга бейтапкананын 141 кызматкери кол койгон.
Эске салсак, буга чейин оорукананын айрым кызматкерлери Кожомовдун жана бейтапкананын башкы мээрбаны Сайрагүл Асатованын үстүнөн арызданып, алардын кызматтан кетүүсүн талап кылышкан. Анда алар ооруканада коррупциялык иштер орун алып жатканын, кызматкерлерди негизсиз жумуштан алуу саясаты жүрүп жатканын жана башка жүйөлөрүн айтышкан болчу.
Пикирлер (6)