Жалал-Абадда бүт кызматкерлери коронавируска чалдыккан оорукана жабылды деген министрдин сөзү чындыкка дал келбейт. Мындай пикирин Жалал-Абад облустук штабынын жетекчисинин орун басары Урмат Боржуев turmush.kg басылмасына билдирген.
Ага ылайык, аталган ооруканадан коронавируска чалдыккан 13 адам чыгарылгандан кийин дезинфекциялоо иштери жүргүзүлгөн.
"Учурда башка бейтаптарды кабыл алууга даяр, оорукана жабылган эмес, ичинде бригада иштеп жатат”, - деген Боржуев.
Ошондой эле ал оорукананы бир кызматкеринде гана коронавирустун белгилери аныкталганын, калгандары бул илдетке чалдыкпагандыгын билдирген.
Эскерте кетсек, буга чейин саламаттыкты сактоо министри Сабиржан Абдикаримов бүгүн, 8-апрелде онлайн брифингде Жалал-Абадда кызматкерлери бүт коронавируска чалдыккан оорукана жабылганын кабарлаган эле.
Пикирлер (0)
Пикир жок. Сиз биринчилерден болушуңуз мүмкүн