Премьер-министрликке талапкер Боронов ага ишеним көрсөткөндөргө ыраазы болду

Мухаммедкалый Дүйшөкеевич өкмөт башчылыктан кетүү тууралуу саясий чечим кабыл алды, учурдан пайдаланып анын келечектеги иштерине ийгилик каалайбыз, деп билдирди премьер-министрлик кызматка талапкер Кубатбек Боронов бүгүн, 16-июнда Жогорку Кеңештин Көпчүлүк коалициясынын жыйынында сөз сүйлөп жатып.

“Ушул учурда менин талапкерлигимди туура көрүп, ишеним көрсөтүп, сунуштап жана колдоп жатканыңыздар үчүн депутаттарга терең ыраазычылык билдирем”, - деп айтты Кубатбек Боронов.

Ал белгилегендей, өзгөчө кырдаалдар министри болуп 7 жыл, өкмөттө биринчи вице-премьер-министр болуп 2,5 жыл иштеген. “Менин саясий ишмердүүлүгүм элдин көз алдында жана сыноосунда болуп келгенин билдиргим келет. Азыркы президент Сооронбай Шарипович премьер-министр кезинде сунушталган “Ишеним жана биримдик” жана анын улантуучусу “Ишеним, биримдик жана жаратмандык программаларынын алкагында өкмөттүн кабыл алынган иш-чаралары аткарылып келе жатат. Мындан ары да ушул багытта иштер улантылат”, - деди Боронов.

Ал кошумчалагандай, экономиканы кризистен натыйжалуу алып чыгуу жана андан ары өнүктүрүү боюнча комплекстүү иш-чаралардын пакетин ишке ашыруу өкмөттүн негизги багыттарынын бири.