Жалал-Абад облусунун Сузак районунда күйөөсү тарабынан зордук-зомбулукка кабылган аял тосмо арыз жазды. Бул тууралуу маалыматты "Медиа центр" мультимедиалык-маалымат агенттигине Жалал-Абад ОИИБдин басма сөз кызматынан тастыкташты.
Маалыматка караганда, бул окуя боюнча сотко чейинки өндүрүш иши ачылып, күйөөсү 11-июнда Сузак РИИБдин убактылуу кармоочу жайына киргизилген.
"13-июнь күнү баш коргоо чарасы каралып, Сузак райондук сотунун тергөө судьясы тарабынан 15 күндүк мөөнөткө камоо чарасы тандалган. Белгилей кетүүчү жагдай, жабырлануучу күйөөсүн кечиргендигин билдирип, тосмо арыз жазган", - деп айтылат маалыматта.
Буга чейин аялын байлап, мыкаачылык менен сабаган киши милиция тарабынан кармалгандыгы маалымдалган. Окуя 8-июнь күнү саат 11:00 чамаларда Сузак районундагы айылдардын биринде орун алган.
"Сузак районунун 1969-жылы туулган тургуну Б.З. үйүндө 1973-жылы туулган М.Д. аттуу аялынын моюнуна дөңгөлөк байлап, чакалап суу чачкан. Окуя боюнча М.Д. 11-июнь күнү Сузак РИИБге арызданган. Бул окуя Сузак РИИБдин Кылмыштардын жана жоруктардын бирдктүү реестрине каттоого алынып, КРнын Жоруктар жөнүндө кодексинин 75-беренеси менен үй-бүлөдөгү зомбулук болуп катталып, тиешелүү материалдар топтолгон соң, КРнын Жазык кодексинин 144-беренеси (Уруп-согуп кыйноо) болуп өзгөртүлгөн. Күйөөсү Сузак районунун тургуну Б.З. кечээ, июнда Сузак РИИБдин убактылуу кармоочу жайына киргизилген", - деп маалымдаган милициядан.
Буга чейин вице-премьер-министр Аида Исмаилова өкмөткө караштуу Аялдар иши жана гендердик өнүктүрүү боюнча улуттук кеңештин жыйынын өткөрүп, анда Сузактагы зордук-зомбулук маселеси талкуулангандыгын өкмөттүн басма сөз кызматы билдирген.
Пикирлер (0)
Пикир жок. Сиз биринчилерден болушуңуз мүмкүн