Таласта коронавирус үч милициядан жана соттолгон адамдан аныкталды

Талас облусунда 29-июнга карата коронавирус аныкталган 9 адамдын үчөө милиция кызматкерлери. Бул тууралуу Талас облустук ооруларды алдын алуу жана мамлекеттик санитардык-эпидемиологиялык көзөмөлдөө борборунун башкы дарыгери Чолпон Сагындыковага таянуу менен жергиликтүү басылмалар жазып чыкты.

“Облус аймагында бүгүн, 29-июнь күнү коронавирустун 9 учуру катталды. Анын 2 учуру Талас шаарынан, 4 учуру Талас районунан, 1 учуру Бакай-Ата районунан, 1 учур Манас районунан, 1 учуру Кара-Буура районунан. Булардын ичинен Талас облустук ооруканасынын кардиология бөлүмүндө жаткан 3 бейтаптан, Бакай-Ата районунан 1 медайымдан илдет аныкталды. Ички иштер бөлүмүнүн 3 кызматкеринен да вирус чыкты. Алардын экөөсү обсервацияны кайтарган. Үчүнчүсү конвойдо, соттолгон адамды кайтарып жүргөн. Соттолгон адамдан дагы вирус чыкты. Калган 2 учур мурун вирус аныкталган бейтаптар менен байланышта болгондор”, - деген Сагындыкова. 

Белгилей кетсек, 29-июнга карата коронавирус инфекциясынын жаңы 269 учуру катталып, ооруну жуктургандардын жалпы саны 5 миңден ашты.