Жапаров менен Мирзиёев кыргыз-өзбек мамилелеринин актуалдуу маселелерин талкуулады

Президент бүгүн, 15-сентябрда, Садыр Жапаров Самарканд шаарында Өзбекстан Республикасынын президенти Шавкат Мирзиёев менен жолугушту.

Өлкө лидерлери жакшы динамикага ээ жана жаңы деңгээлге чыга ала турган кыргыз-өзбек эки тараптуу кызматташтыгынын актуалдуу багыттарын талкуулашты.

Буга байланыштуу Өзбекстандын Президенти биргелешкен долбоорлорду ишке ашыруу аркылуу ишин ийгиликтүү баштаган Өзбек-Кыргыз өнүктүрүү фондунун ишмердүүлүгүн кеңейтүүнүн маанилүүлүгүн белгиледи.

Шавкат Мирзиёев “Кытай-Кыргызстан-Өзбекстан” темир жолун куруу боюнча үч тараптуу Макулдашуунун түзүлгөнүн канааттануу менен белгиледи. Тараптарга пайда алып келе турган бул масштабдуу долбоорду активдүү ишке ашырууга өзбек тараптын кызыкдар экени айтылды.

Мындан тышкары, Өзбекстандын Лидери эки өлкөнүн энергетикада, анын ичинде ири долбоорлорду ишке ашыруудагы кызматташуусун тереңдетүүнүн, ошондой эле эки өлкөнүн региондорунун, өзгөчө чек арага жакын облустардын жана райондордун ортосундагы кызматташтыкты активдештирүүнүн маанилүүлүгүн белгиледи.

Шавкат Мирзиёев өзбек тарап Кыргызстанга сапарына кызуу даярдык көрүп жатканын жана ал эки тараптуу кызматташтыктын бардык багыттарына күчтүү импульс берерине ишенимин билдирди.

Өз кезегинде Президент Садыр Жапаров өзбек кесиптешине меймандостугу, өзбек тараптын Шанхай Кызматташтык Уюмуна төрагалыгы астында иш-чараларды жогорку деңгээлде уюштургандыгы үчүн ыраазычылык билдирип, ошондой эле Саммитти даярдоонун жүрүшүндө Самаркандда жүргүзүлүп жаткан масштабдуу жаратмандык иштерди белгиледи.

Садыр Жапаров кыргыз-өзбек мамилеси барынан мурда тыгыз тарыхый, маданий жана руханий байланыштар менен шартталганын белгиледи.

«Биз элдерибиздин ортосундагы достукту, биримдикти жана бир туугандык байланыштарды ар дайым баалайбыз жана колдойбуз. Бул биздин жалпы мурасыбыз. Бүгүнкү күндө Кыргыз Республикасы менен Өзбекстан Республикасы жакын коңшулар, бекем достор жана стратегиялык өнөктөштөр», - деди ал.

Садыр Жапаров Кыргызстан бир тууган Өзбекстан менен саясий кызматташтыкты мындан ары да чыңдоого жана соода-экономикалык жана маданий-гуманитардык байланыштарды кеңейтүүгө толугу менен даяр экенине ишендирди.

Президент Садыр Жапаров кыргыз тарап транспорттук-транзиттик тармакта, анын ичинде “Кытай-Кыргызстан-Өзбекстан” темир жолун куруу долбоорун ишке ашыруу боюнча да өз ара аракеттенүүнү активдештирүүгө кызыкдар экенин билдирди.

Мамлекет башчылары “Кытай-Кыргызстан-Өзбекстан” темир жолун жана Камбар-Ата ГЭС-1ди куруу долбоорлорун ишке ашыруунун маанилүүлүгүнө өзгөчө көңүл бурушту. Бул жана башка долбоорлорду тез арада ишке ашыруу эки өлкөнүн гана эмес, бүтүндөй Борбор Азиянын өнүгүүсүнө өбөлгө болорун белгилешти.

Жолугушуунун соңунда Кыргызстан менен Өзбекстандын лидерлери эки өлкөнүн ар түрдүү тармактардагы ар тараптуу кызматташтыгы мындан ары да кеңейип, тереңдейт деген ишенимин билдиришти.