Жөө күлүк Оболбек Осмонбеков Бишкектен Ошко чуркап келди

Ат-Башы районунун тургуну, жөө күлүк Оболбек Осмонбеков Бишкектен Ош шаарына чейинки 700 чакырым аралыкты 8 күндө чуркап жетти.

Маалым болгондой, аны тосуп алуу аземине Ош шаардык жана Кара-Суу районунун спорт жана дене тарбия комитетинин башчылары жана өкмөттүн Ош облусундагы ыйгарым укуктуу өкүлүнүн социалдык өнүгүү башкармалыгынын башчысы Абдували Балтабаев катышты.

Оболбек Осмонбеков 700 чакырым жолду аба-ырайынын кескин өзгөрүп, суук болуп кеткенине карабастан эч кыйынчылыксыз багындырганын айтты. Оболбек Осмонбеков 46 жашта, аны коштоп чуркап келген баласы Али Оболбек уулу 22 жашта.

Эске салсак, буга чейин Оболбек Осмонбеков 2020-жылдын 19-июнунда Ат-Башыдан Бишкек шаарын көздөй жөө чуркап чыгып, 24-июнда Бишкек шаарына жеткен болчу.