Өлкөдөгү мейманкана жана курортторго "жылдыз", боз үйлөргө "түндүк" ыйгарылат

Өлкөдөгү мейманкана жана курортторго "жылдыз", боз үйлөргө "түндүк" ыйгарылат. Токтомго министрлер кабинетинин төрагасы Адылбек Касымалиев кол койду.

Маалыматка ылайык, мейманканалар жана курорттор арасында биринчи жылдыз ээлери ушул жылы аныкталат.

Сунуш боюнча мейманканаларга бирден бешке чейин жылдыз, конок үйлөргө төрткө чейин эдельвейс, боз үй лагерлерине дагы төрткө чейин түндүк берилет.

"Жаңы стандарт менен коноктор кайсы жерде сапаттуу тейлөө кызматы көрсөтүлөрүн дароо түшүнсө болот. Мунун баары туристтерди тейлөөнүн сапатын жакшыртуу үчүн жасалууда", — деп айтылган маалыматта.

Классификациялоо биринчи этапта ыктыярдуу болуп, аларды баалоо санариптик платформада жүргүзүлөрү кошумчаланды. Ал эми сапатты аныктоодо эл аралык тажрыйба колдонулмакчы.