14 жаштагы кызды зордуктоого шектелип 24 жаштагы адам кармалды

Сокулук районунда 14 жаштагы кызды зордуктаганга шектелген адам кармалды. Бул тууралуу Чүй ОИИБнын басма сөз кызматынан билдирди.

Маалыматта Чат-Көл айылында 14 жаштагы кыз зордукталып, милиция чара көрбөй жатат деген билдирүү чындыкка дал келбей турганы айтылат. 

Белгилүү болгондой 2019-жылдын 14-декабрь күнү Сокулук милициясына У.А. аттуу жаран арыз менен кайрылып, 2019-жылдын сентябрь айынын аягында Максат аттуу бала анын жашы жете элек кызын күчкө салып “БМВ” үлгүсүндөгү автоунаасына салып, зордуктаганын билдирген.

Аталган факт 161-берене (зордуктоо) менен катталып, сотко чейинки өндүрүш иштери башталган. Териштирүү иштеринин жүрүшүндө шектүүнүн өздүгү аныкталып, ал 24 жаштагы К.М. болгону такталган.

16-июнь күнү анын жүргөн жери тууралуу ыкчам маалымат алынып, жүргүзүлгөн иш-чаралардын натыйжасында 17-июнга караган түнү болжол менен саат 00:30 чамасында Бишкек шаарындагы көчөлөрдүн биринен кармалган.

Учурда кармалган жаран убактылуу кармоочу жайга киргизилип, сотко чейинки өндүрүш иштери улантылып жатканы айтылат.