50 миң сомдон пара берип турган. Баткенде контрабандалык иштердин негизги уюштуруучуларынын бири кармалды

Контрабандалык иштердин негизги уюштуруучуларынын бири кармалды. Бул тууралуу УКМКнын басма сөз кызматы билдирди.

  2022-жылдын 15-февралында УКМК тарабынан республиканын экономикалык коопсуздугун камсыз кылуу боюнча жүргүзүлүп жаткан ыкчам-издөө иш-чараларынын натыйжасында кылмыштын белгилери боюнча козголгон кылмыш ишинин алкагында, КР Кылмыш-жаза кодексинин 345-беренесинин 1-бөлүмү (кызмат адамдарына пара берүү) боюнча Баткен облусунун аймагында контрабандалык иштер менен алектенгендердин бири - Кыргыз Республикасынын жараны Н.Б.А. кармалды.

  Аталган жаран кыргыз-тажик мамлекеттик чек арасы аркылуу контрабандалык жүктөрдү ай сайын тоскоолдуксуз алып өтүү үчүн УКМКнын кызматкерине 50 000 сом өлчөмүндө пара берип жаткан учурда кармалган.

Учурда тергөө амалдары жүрүп жатат.