Бишкек ШИИБ Болот Темировго козголгон кылмыш иштери тууралуу маалымат берди

Бишкек шаардык ички иштер башкармалыгы иликтөөчү журналист Болот Темировго козголгон кылмыш иштери боюнча түшүндүрмө берди.

Мекеменин басма сөз кызматы тараткан маалыматка караганда, ал Кылмыш-жаза кодексинин 379-беренеси (Документти жасалмалоо), 378-беренеси (Кыргыз Республикасынын мамлекеттик чек арасын мыйзамсыз кесип өтүү) боюнча шектелүүдө. Маалыматта Темиров Орусиянын жараны экенин билип туруп мыйзамды бузуп, жалган документтер менен Кыргызстан жарандыгын алганы, паспортун бир нече жолу алмаштырганы жана ошол документ менен бир нече жолу чек арадан өткөнү айтылат.

Шаардык ички иштер башкармалыгынын Тергөө кызматы бул маалыматтар Кылмыш-жаза кодексинин 283-беренесинин 1-бөлүгүнүн негизинде быйыл январда (Баңги каражаттарын, психотроптук заттарды жана алардын аналогдорун сатуу максатын көздөбөстөн мыйзамсыз даярдоо) козголгон кылмыш ишти тергөөнүн алкагында аныкталганын билдирген.

Мурдараак Болот Темиров өзүнө дагы үч кылмыш иши козголгонун билдирип, муну бийликтин басымы катары баалап, журналисттик ишмердүүлүгү менен байланыштырган. Ал бүгүн, 20-апрелде суракка чакырылган.  

Булак: "Азаттык"