Бишкекте CASC-2025 эл аралык стартап-форуму өтөт

Бишкекте 24-25-апрель күндөрү CASC-2025 эл аралык стартап-форуму өтөт. Бул тууралуу “Биринчи радионун” түз эфиринде Кыргызпатенттин инновациялар жана стратегиялык өнүктүрүү бөлүмүнүн башчысы Айсулуу Мустапакулова билдирди.

Анын айтымында, мындай масштабдуу иш-чара Кыргызстандын тарыхында биринчи жолу өтүп жатат. Ага Борбор Азиянын жетекчи экосистемалык оюнчулары жана инвесторлору чогулушат.

“Форумга 1 миң катышуучу, анын ичинде стартаптар, инвесторлор, корпорациялардын жана мамлекеттик түзүмдөрдүн өкүлдөрү катышат. Спикерлердин арасында жетекчи инвесторлор, эл аралык компаниялардын өкүлдөрү жана ийгиликтүү стартаперлер да бар. Эки күндүн ичинде катышуучуларды панелдик талкуулар, питчинг сессиялары, көргөзмөлөр, бизнес жолугушуулар жана окутуу мастер-класстар күтөт. Мындан сырткары, форумдун алкагында “Стартаптар аллеясы” өтөт, бул инвесторлордун жана потенциалдуу кардарлардын көңүлүн долбооруңузга буруу үчүн эң сонун мүмкүнчүлүк”,-деди ал.

Мустапакулова белгилегендей, форум негизги төмөнкү темаларды камтыйт:

• венчур инвестициялары жана Борбор Азиянын стартап-экосистемасы;

• стартап-индустриядагы глобалдык тренддер;

•стартаптар үчүн питчинг сессиялары жана $10,000 чейинки инвестиция алуу мүмкүнчүлүгү;

“Форумга катышуу үчүн, алгач арыз берүү керек. Келип түшкөн арыздар 18-апрелден 23-апрелге чейин каралат. Андан соң, кабыл алынгандар эки күндүк форумга чакырылат. Ошондуктан катышууга арыз жөнөтүп жетишип калуу керек. Форумга катышуу тууралуу кеңири маалыматты http://www.startupcup.asia сайтынан тапсаңыз болот”,-деди ал.