Изделип жаткан өспүрүм эже-сиңдилер Баткенден табылды

Жалал-Абад облусунда дайынсыз болуп жаткан бир туугандарды милиция таап, апасына өткөрүп берди. Бул тууралуу ОИИБдин басма сөз кызматы билдирди. 

Буга чейин 2004-жылы туурган С.Н. жана 2005-жылы туулган  С.Н. 18-июль күнү Кочкор-Ата шаарынан үйгө кетебиз деп чыгышкан бойдон дайынсыз болуп жаткандыгы тууралуу маалымат жарыяланган. 

"ЖМКга маалымат жарыяланган соң, бир тууган кыздардын болжолдуу жүргөн жери аныкталган. Ноокен РИИБдин кызматкерлери тарабынан жүргүзүлгөн ыкчам-иликтөө, издөө иштеринин натыйжасында өспүрүм кыздар Баткен облусунун Кызыл-Кыя шаарынан табылып, Ноокен районуна алып келинип, апасына өткөрүлүп берилген. Кыздарды сураган учурда Кызыл-Кыяга тааныштарыныкына кетип калгандыгын билдирген.

Өспүрүмдөрдүн апасы кыздары аман табылганына сүйүнүп, милицияга жана жакындан колдоо көрсөткөндөргө ыраазычылык билдирди", - деп айтылат маалыматта.