Буга чейин биздин сайтта учурда Евразиялык экономикалык союздун сотунун Кыргызстандын атынан судьясы болуп отурган Галина Скрипкинанын өмүр таржымалында Ленин райондук сотунун судьясы болуп иштегени көрсөтүлбөй калганы тууралуу макала суроо иретинде жазылды эле. Ырасында эле расмий маалыматтарда Галина айым Жогорку Кеңешке депутат болуп келгенге чейин Бишкек шаарында түрдүү ишканаларда, уюмдарда юристконсульт кызматтарын аркалаганын көрсөтүп, бирок Бишкек шаарынын Ленин райондук сотунда судья болуп иштегенин көрсөтпөй койгон.
Өткөндөгү макалабызда Скрипкина Ленин райондук сотунун судьясы болуп иштеп туруп, бир кылмыш ишин карап, андагы айыпталуучуну айып пулга жыккан чечим чыгарганын жазганбыз. Бирок, ошол акчаны ал мамлекеттин казынасына түшүрбөй эле, өз чөнтөгүнө буруп койгону тууралуу да кепти өз оозунан угуу максатында собол салганбыз. Ошондон улам, ал судьялык кызматтан мөөнөтүнөн мурда кеткен эмес беле деген суроону узаткан элек.
Бирок, бүгүнкү күнгө чейин Галина айым тараптан бир ооз жооп болгон жок. Эгерде ал судья болуп иштеген болсо, анда эмнеге аны жашырат? Же өмүр баянына киргизбей койгонунун сыры эмнеде эле? Мына ушул суроого өз оозу менен жооп кылып койгону туура болмок.
Ал өзү жооп бергиси келбегени менен, биздин редакцияга Галина Анатольневнанын эмгек жолуна байланышкан документтин көчүрмөсү келип түштү. Анда анын 1982-жылы Ленин райондук сотунун судьялык кызматына шайланганы, кайра 1986-жылы мөөнөтүнөн мурда аркага чакыртылып алынганы көрсөтүлүп турат. Демек, анын бул кызматты аркалаганы анык. Бирок, эмне себептен мөөнөтүнөн мурда кызматынан кеткенинин сыры табышмак. Балким, чындап эле айып пулду өз чөнтөгүнө буруп койгону үчүн эмеспи?
Акыйкат жана адилеттүү сот системасы курулуш үчүн, ар бир соттун өмүр таржымалы ачык болушу керек. Өзгөчө Кыргызстандын атынан абройлуу эл аралык союзда судья болуп отургандардын басып өткөн жолдору шек жаратпашы абзел. Андыктан Галина айым өзүнүн өмүр баянынан алынып салынган жагдайы тууралуу элге эртерээк түшүндүрмө берип койгону туура болот го. Эгер ал өзү бир кездеги ишмердүүлүгүн жашырганын мойнуна алса, анын Евразиялык экономикалык союзунун судьялыгын аркалашы юридикалык жактан, моралдык жактан дагы туура болбой калбайбы?
Пикирлер (2)