Милиция кызматкерлери 23 жаштагы кызды ала качкан жигиттерди 17 мүнөттө тапты

Бишкектен кыз ала качты делген жигиттин унаасы токтотулуп, айып аянтчасына киргизилди. Бул тууралуу Чүй облустук милициясынын Жол кыймылынын коопсуздугун камсыздоо башкармалыгынан билдиришти.

Маалыматка ылайык, бүгүн, 1-майда саат 00:03 чамаларында Бишкек шаарынан 25 жаштагы Н.уулу А. "Мерседес Бенц" үлгүсүндөгү унаасы менен 23 жаштагы К.А. аттуу кызды ала качып кеткен деген маалымат түшкөн.

Анын негизинде саат 00:20 чамаларында Ысык-Ата райондук милициясынын жол кыймылынын коопсуздугун камсыздоо бөлүмүнүн кызматкерлери “Мерседес Бенц” үлгүсүндөгү унааны токтотуп, Бишкек шаарынын Ленинин райондук милициясынын тергөө кызматына өткөрүп берген.

Унаа айып аянтчасына киргизилди.