Москвада ЕЭК кеңешинин кезектеги жыйынында бир катар маанилүү чечимдер кабыл алынды

Министрлер кабинетинин төрагасынын биринчи орун басары Адылбек Касымалиев Москвада өткөн Евразия экономикалык комиссиясынын Кеңешинин кезектеги жыйынына катышты.

Министрлер кабинетинен билдиришкендей, жыйындын күн тартибинде 49га жакын маселе каралды.

Алсак, отурумдун жүрүшүндө Комиссия кеңешинин мүчөлөрү Евразия экономикалык биримдигинин жана үчүнчү тараптын бирдиктүү бажы транзиттик системасы жөнүндө макулдашууну жактырышты жана тараптарга кол коюу үчүн зарыл болгон мамлекеттик ички жол-жоболорду жүргүзүүгө жөнөтүштү.

Макулдашуунун негизги максаты - биримдиктин бажы чек арасы жана үчүнчү жактардын бажы чек аралары аркылуу товарларды ташуу үчүн жагымдуу шарттарды камсыз кылуу, ошондой эле чек ара аркылуу ташып келүүлөрдүн коопсуздук деңгээлин жогорулатуу.

Кыргыз Республикасынын демилгеси менен электр кыймылдаткычтары бар автотранспорт каражаттарынын айрым түрлөрүнө карата импорттук бажы алымдарынан бошотуу түрүндөгү тарифтик жеңилдиктерди берүү жөнүндө чечим кабыл алынды.

2024-2025-жылдары Кыргызстанга импорттолуучу электр кыймылдаткычтары бар автотранспорт каражаттарынын айрым түрлөрү үчүн жыл сайын 10 миң даана автотранспортко тарифтик жеңилдиктерди камсыз кылуу каралууда.

Бажы алымдарынан бошотуу түрүндөгү тарифтик жеңилдиктерди берүү жөнүндө чечим бодо малдын этине карата, Кыргыз Республикасы үчүн 3,5 миң тоннадан ашпаган көлөмдөгү эт азыктарын өндүрүүгө колдонуу үчүн да кабыл алынды. Кеңештин жыйынынын алкагында үчүнчү өлкөлөр менен соодада тарифтик эмес жөнгө салуу чаралары колдонулуучу товарлардын бирдиктүү тизмесине кирген товарларды экспорттоого жана (же) импорттоого лицензияларды жана уруксаттарды берүү эрежелери бекитилди.

Бул эрежелер, эгерде бул бирликке мүчө мамлекеттин улуттук мыйзамдарында каралса, автоматтык режимде электрондук документ түрүндөгү лицензияны же уруксатты берүү (каттоо) мүмкүнчүлүгүн караган нормаларды камтыйт.

Мындан тышкары, Комиссия кеңешинин мүчөлөрү бажы операциялары артыкчылыктуу тартипте жүзөгө ашырылган тез бузулуучу товарларга таандык болгон товарлардын категорияларынын бирдиктүү тизмесин бардык мүчө мамлекеттер үчүн туруктуу негизде түзүү чечимин кабыл алышты. Ушул эле чечим менен тез бузулууга дуушар болгон товарлардын категорияларынын тизмеси, аларга карата бажы операциялары артыкчылыктуу тартипте “жаңы плантайндар” позициясы менен толукталды.

Комиссиянын кеңешинин мүчөлөрү Евразия экономикалык бирлигинин бажы чек арасында жана Евразия экономикалык бирлигинин бажы аймагында ветеринардык көзөмөлдүн (текшерүүнүн) бирдиктүү тартиби жөнүндө жобого, ошондой эле медициналык колдонуу үчүн дары-дармек каражаттарын каттоо жана экспертиза жүргүзүү эрежелерине өзгөртүүлөрдү киргизди.

Ошондой эле отурумдун жүрүшүндө Евразия экономикалык биримдигине мүчө-мамлекеттердин эмгекчилерине жана алардын үй-бүлө мүчөлөрүнө ишке орношуу маалында медициналык жардам көрсөтүү чөйрөсүндө өз ара аракеттенүү ыкмаларын иштеп чыгуу маселеси жөнүндө баяндама каралды.

Комиссиянын кеңешинин чечими менен товардын келип чыгышы жөнүндө сертификаттын электрондук же кагаз көчүрмөсүн, кийинчерээк документтин түп нускасын милдеттүү түрдө берүү шарты менен пайдалануу мүмкүнчүлүгүнүн, ошондой эле 2024-жылдын 31-декабрына чейин товарларды түз сатып алуу боюнча талаптарга тарифтик преференцияларды берүү үчүн бул милдеттүү шарттардын бири катары колдонбоо мөөнөтү узартылды.

Ошондой эле 2030-жылга жана 2045-жылга чейинки мезгилге Евразия экономикалык биримдигинин алкагында интеграциялык процесстерди андан ары өнүктүрүүнүн негизги максаттары жана негизги багыттары жана ЕАЭБдин иштеши жөнүндө отчеттор каралды.

Жыйындын жүрүшүндө Жогорку Евразиялык экономикалык кеңештин жыйынынын күн тартиби бекитилди.